شكرا تقوى فكرة هايلة هاذي احسن طريقة باه نتعلمو مليح لخياطة ونديرو كوراج لبعضانا انا خيرت هذا المودال راني حملت الصور بالترتيب من الصورة رقم 1 حتى الأخيرة كيما شرحت تقوى في الصفحة رقم 11 بسم الله الرحمان الرحيم نبدو على بركة الله اليوم قندورة soradz نحتاجو 1 : 3 متر من القماش للطول العادي مثال انا طولي 165 تجيني 3 متر الا عندك شك قيسي طولك من الكتف للقدم و اضربيه في 2 خاطر لقماش بش نطبقوه على 2 2 : 7متر بيي 3 : قندورة قياس ملاحظة : لقماش اذا كان فيزكوز حطيه يترنخ في الماء و يشرب مليح اذا خفتي يطلق زيدي الخل مع الماء امبعد اعصريه عادي و طبقيه على 4 و انشريه كي يعود قريب يشيح يعود مندي نحيه طبقيه خليه يكمل يشيح . هذا مخطط القندورة الصورة رقم 1 نقيسو من خلف الرقبة حتى للمرفق ولا لوين حابين توصلو اليدين احتفضو بالرقم و الا كيلي الصورة رقم 2 نجيبو لقماش الصورة 3 نطبقوه على 2 الصورة 4 درك نحتاجو لهداك الرقم اللي احتفضنا بيه او الكيلو نقيسوه من طرف الكتان حتى القيس المطلوب في الجهة المغلقة من الكتان هذا راح يكون كتف و مراوح في نفس الوقت الصورة 5 الصورة 5 و نطبقو في هداك الحد الصورة 6 نقصو الزايد الصورة7 هدي القطعة اللي بش نخدمو بيها الصورة 8 نجيبو لقياس تاعنا نطبقوه على 2 بالطول و نحطوه على لقماش لكتف مع الكتف و نرسمو لاطاي تاعنا لقماش يكون على وجو كي ترسمو لاطاى نحتاجو الرسم امبعد كيما فالصورة 9 نجو للمراوح نرسمو من الفوق نهبطو قدقد قيمت شبر و نبدو نقوسو حتى نوصلو للخصر كما في الصورة 10 نقسو الزايد من تحت و المراوح الصورة 11 نرسمو الرقبة مدورة ولا v كيما تحبو انا درتها مدورة و قصوها الصورة 12 نتحصلو على هاد الشكل الصورة 13 نحلو القندورة الصورة 14 و نطبقوها بالطول الصورة 15 نرسمو الرقبة تاع الصدر الصورة 16 نقصوها نتحصلو على هاد الشكل الصزرة 17 ما تنسوش تفصلو الدوبلير تاع الرقبة و الظهر يجو قطعة وحدة و هك القندورة اصبحت جاهزة و هك نكونو كملنا التفصال الصورة 18 نكملو نرسمو لاطاي تاع الجهة الاخرى الصورة 19 نجو للخياطة 1 : نركبو الدوبلير تا الرقبة و نقلبوه ونرقدوه 2 ّ: نجيبو البيي و نغلفو بيه هاديك الدائرة الصغيرة اللي في الرقبة 3: نغلفو فوقها بالبيي كيما فالقندورة 4 : نجيبو بيي 2 متر او اكثر نحكمه من النص و نبدو من الظهر نركبوه و نمشو خت نعدو على الصر و ندير التقويسة اللي فالصدر و نحبسو امبعد ن 5 : ديري البيي للمراوح 6 : نقلب القندورة من داخل و نخيطو الجناب من نهاية لمراوح للتحت 7 : نرجعو نقلبو القندورة على وجها و نتبعو هداك الخط اللي رسمناه فالاول تاع لاطاي ما تقفلوش بزاف نوصلو للصدر و نحبسو بش ماتجيش المراوح مهزوزين 8 : روحي قيسيها و شوفي لاطاي و الحلة تاع الطابق قبل ما تركبي عليهم البيي و الا جاتك مليحة ارجعي كملي لصقي البيي فوق الخياطة تاع لاطاي 9 : نجيبو طرف بيي نكفوه و ندخلوه فهاديك الدائرة و نعقدوه و نخيطو طرف في الجهة و الطرف لاخر في الجهة لخرى 10 : كفيها على قدك ولا ديري سيرفلاج كيما تحبي 11 : نظفيها من لخيوط و حديها بصحتك هك نكونو كملنا ان شاء الله الشرح وافي وكافي و فهمتوني كاين اللي يقصلو لمراوح وحدهم و يركبوهم مي انا اعتمدت طريقة الفراشة اسهللكم كاش سؤال راني في الخدمة