السلام عليكم ورحمة الله وبركاته كان عندي مدة وانا نحوس على جينواز يكون خفيف وهشيش لانو مرة ذوقتو في محل في العاصمة وكان هذاك المحل راقي يعني الباتيسري نتاعو رووووووووعة خويا جاب تارت انا هبلت غير على الجينواز وقولت كيفاش ديرها صدقوني روووعة جدا من بعدها وانا غير نحوس جربت انواع بصح النتيجة ماكنش واحدة حبيبتي هي الي ورتلي وحد الجينواز وقالتلي انو هذا هو الاصل نتاعو يعني بدون محسن واكيييد في بديل وهو في مكان المحسن يعني خميرة القاطو هو الحمام المائي جربتو وكانت النتيجة روووووووعة بصح انا حبيتو يكون هشيش وابيض اي ملا زدت المايزينة وكي طابت مصدقتش روحي وليت نزغرد من الفرحة وقولتلهم هذا هو الجينواز نتاع الصح ههههههههههه طولت عليكم بقصتي الطويلة ههههه نبدأ بالمقادير وهو اقتصادي وسهل 6حبات بيض كأس سكر عادي اي 140غ كأس فرينة نفس الكأس ناقص 2مغارف نعوضهم بالمايزينة قرصة ملح وفاني التحضير نحط البيض مع السكر نضرب مليح بالباتور من بعد ندير حمام مائي وندير البيض ونضرب بالباتور حتى يضاعف الحجم نتاعو كيما في الصورة ويرجع ابيض شوفتو كيفاش ولا الان نحط الفرينة مع المايزينة والقرصة الملح نخلط ونحطهم دفعة واحدة ونستمر في الخلط بالباتور الان نحطها في المول وندير الورق انا كبرت الورق باش يضاعف معها ندخلها الفرن يكون مسخن مسبقا ومن بعد نقص عليه على نار هادئة الان بعد ما طابة نسيت مصورتهاش قبل ما نقسمهاأولاد اختي هبلوني بصح شوفوها كيفاش ولات بيضة وهشيشية وهذا هو المطلوب نشربها ميلح وندير لاكرام شانتي ونطليها كامل بلاكرام التزين انا خترت هذا عجبني بززاف ندير ورق المطبخ في النصف مثل الصورة ندير الشكولا في النصف والثاني ندير الكيوي على الجوانب نكمل التزين بالفواكه في الجانب الابيض وندير بالكرام شاني تزين فوق الشكولا ومننساش الجولي فوق الفواكه واش رايكم وررررعة وذوق ماشاء الله امممممممممممممم صدقوني هذي خفيفة خصوصا اذا تشربت مليح مش رايحين تستقناو عليه ابدا وهذي درتها في عيد ميلاد ماما ربي يحفظها ويطول في عمرها ماما حبيبتي عن قرب ان شاء الله تعجبكم الوصفة هذي متنساوش دعواتكم وثاني رودود كم ................... في امان الله