هذه طريقتي لإعداد قراتان و طاجين الشفلور و الكفتة - شفلور منقي و مغسول - حبة بطاطا مقشرة و مغسولة - نحطهم يغليو في قدرة حتان يطيبو من بعد نحطهم في كسكاس يقطرو ا و يبردوا -من جهة أخرى نحضروا الكفتة نأخذ قدرة نحط فيها قطع دجاج أنا درت شوية صدر مع حبة كبيرة بصل مرحية و 2 سنينات ثوم مرحيين و نصف حبة طماطم مرحية رقيق و نصف م ص فلفل أسود و نصف م ص كزبرة يابسة مرحية و ربع م ص كروية مرحية إذا توفرت و ملح و شوية زيت -نحطهم يتقلاو مع ربع كاس ماء كي يتقلاو مليح ومن بعد نحي 2 م ك من التقلية - من بعد نمرق و كي يغلي نضيف حبات الكفتة اللي نكونو محضرينهم من قبل (لحم مرحي + شوية بصل مرحي + ملح و فلفل أسود + كمشة أرز مغلي و مصفى + بيضة+ معدنوس و كزيرة خضرا مقطعين ) و نخلي الكل يطيب على نار متوسطة - نفتت الشفلور و البطاطا و نضيفلهم المعدنوس و الكزبرة الخضرا و 2 م ك نتاع التقلية و نملح و نضيف الفلفل الأسود و حبة بيض و نخلط الكل نأخذ نصف خليط الشفلور و نعمل منو كويرات نرمدهم في شابلير (خبز مرحي ) و نقليهم في الزيت و النصف الآخر نزيدلو بيضة أخرى و جبن مبشور و زيتون أخضر مقطع و نضعو في مولات مدهونين بالزبدة و مرشوشين بالخبز المرحي و نذرذر عليهم من فوق الخبز المرحي نحطهم في الفور و كي يحمارو من الجوانب نحط 2 ملاعق صغار نتاع زبدة من فوق و نعاود نرجعهم للفور باش يتحمروا من فوق هاو ليكم كلشي واجد الكفتة كي تحطوها في صحن التقديم ضيفولها عصرة قارص من فوق يعطيها ذوق و بنة اممممممممممممم حبيبات الشفلور المكفت حطيتهم ناشفين اللي يحب يغمسهم في المرق أو ياكلهم هكذاك ناشفين تاكلو بالصحة و الهنا و صلى الله على محمد صلى الله عليه و سلم -