[faizarbh]

السلام عليم أحبتي الكرام
ان شاء الله تكونوا في أحسن الأحوال
جبتلكم اليوم عصير منعش ان شاء الله يعجبكم
طريقة صنع المركز تقريبا نفسها اللي داروها في سميرة مع انو دارتها الشاف نوال في رمضان و انا جربتها بالليمون و بالبرتقال و قلت نمزجهم مع بعض فالماء و اعطاتلي نتيجة مذهلة روووعة و ماكاش اللي ما عجبوش قلت نفيدكم بفكرتي البسيطة
نبداو بمركز البرتقال:
نحتاج كيلو برتقال + 500غ سكر
نبشر البرتقال و نضع القشور في صحن و نخلط معهم السكر و نقوم بفركه و ادخالهم في بعضهم بواسطة سباتول او نستعين باليد حتى نحسوه دخل مليح


ثم نقوم بعصر البرتقال و هداك العصير نضيف له القشور اللي خلطناها مع السكر ثم نحركه مليح و نتركه ليلة كاملة يبات مع بعض حتى يذوب السكر كليا .




الان نخدم مركز الليمون:
نحتاج كيلو ليمون (قارص) + 800غ سكر
نفس العملية اللي درناها للبرتقال نديرها للليمون فقط الفرق في كمية السكر البرتقال درنالو فقط 500غ لانو البرتقال حلو و الليمون درنالو 800غ لانو الليمو قارص و يحتاج سكر.

بعدما بيتنا المركزين كل واحد وحدو طبعا راح نصفيهم جيدا من القشور بواسطة شاش و نخرج كل العصارة اللي فيهم و القشور اللي يبقالنا نخبوه فالمجمد و نستعملوه في صنع حلويات اخرى.
هنا هادو المركزين راهم واجدين


درت كاس من مركز الليمون و كاس من مركز البرتقال
و خلطتهم مع طاس تاع ماء بارد و نحركهم مليح و ندخلهم الثلاجة يزيدو يبردو و نقدمهم بالصحة و الهناء




ملاحظة:
هنا انتي تتحكمي فالكمية تاع المركزين يعني تحبي العصير ثقيل او خفيف او نص نص ايلا كان خفيف زيدي نص كاس من كل مركز وايلا جاك ثقيل زيدي الماء يعني حسب الذوق .

تقدري اختي تخبي المركزين في المجمد لحين الاستعمال انا صنعت كمية و خبيتها فالمجد لشهر رمضان الكريم
ولا تنسوني من صالح دعائكم و السلام عليكم.