[oum radja]

بسم الله الرحمن الرحيم


الصلاة و السلام على أشرف المرسلين سيدنا محمد خاتم النبييين صلى الله عليه و سلم
هاذا هو تطبيقي لليوم الاول من الاسبوع الاول للدورة


استيقضت صباحا صليت الفجر قريت اذكار الصباح
ورجعت رقدت شوية
الورد ما نقدرش نقراه بعد الفجر لظروف خاصة
وكي نضنا فطرنا وراح راجلي للخدمة
بديت مباشرة في الغدا خليته يطيب وجيت للميكرو باش نشوف البرنامج
ناض ولدي الصغير فطرته و عطيته دواه و هويت الغرفة و خليتو في السرير تاعو يتفرج و غلقت عليه باب الغرفة حتى ما توصلوش ريحة المنظفات على خاطر هو يتحسس منها
درت سورة البقرة في البورطابل


وجدت بسينة فيها صابون و جافيل و شوية خل و شوية اسيد سيتريك و لبست لاتوني تاع الخدمة و رفدت كامل القش لي في طريقي


كيما الرفوف تاع الاحذية خرجتهم للحوش و نظفتهم
نحيت الريدو
لبس خماري و فتحت الباب و نقيت قدامه
وغسلت الباب مليح بالصابون
وشللته


نظفت السقف تاع الكولوار و الفايونس وقواطع الكهرباء و نظفت الابواب كامل لي في الكولوار
و المرايا تاني


و مسحت مسحة خفيفة للصالون و الغرف و مسحت الغبار
ضربت طلة على الغدا
و رحت للتواليت و الدوش نقيتهم و سيقت الكوزينة و الحوش هو الاخير


بقات نص ساعة على الغدا رحت بدلت قشي
ومشطت و تعطرت
و بديت نوجد حتى دخلو لقاو الدار نقيه

كي تغدينا غسلت المواعين و غسلت اسناني وتوضيت و قريت شوية قرأن حتى أذن الظهر صليت و درت كريم مرطب ليديا و رجليا
وجيت نشوف حباباتي واش دارو فيها


وعندي ملاحظة بغيت نديرها انو كي نكملو التسياق نشللو البليغات و نحطوهم في رفوف الاحذية باش لي يدخل يلبس وحدة ويخلي الصباط مكانها حتى ما يدخلش التراب و الاوساخ للدار
و نقدرو تاني نخلو بليغة خاصة عند التواليت حتى ما ندخلوش النجاسة لديارنا
ربي يتقبل منا الاعمال و شكرا