[oum radja]

السلام عليكم و رحمة الله و بركاته
كيما شفتو العنوان تاع الموضوع
buche glacée من مطبخي
عندي مدة و انا الافكار تدور في راسي باش ندير طورطة ايس كريم كيما اللي تتباع في المحلات و هي غالية الثمن و ما يقدرش الواحد يشريها في اي وقت
المهم قررت اني نغامر و نجرب الفكرة اللي جاتني و قلت ما راني خاسرا والو اذا جات مليحة ناكلوها و نعطيكم الطريقة واذا ماجاتش مليحة تاني ناكلوها ههههههههه
طولت عليكم بالهدرة نخليكم مع الطريقة و الصور طبعا

في البداية نحضرو ايس كريم في البيت بالطريقة اللي راكم متعودين عليها
ماشاء الله المنتدي معمر بالوصفات,انا درت الطريقة تاع الفلون والكرام شونتيي و الحليب
ديري الايس كريم تاعك بلونين مختلفين
انا درت فاني و فراز
جيبي بلاستيك يكون كبير شوية و فرشيه في بلاطو يكون مستطيل كيما اللي يجي في الكوشة مثلا
وبلا ما ديري الايس كريم اللي حضرتيه في الثلاجة ديري الطبقة تاع الفانيليا فوق البلاستيك و سويها مليح حتى تاخذ شكل مستطيل بلا ما تعمري البلاطو وضرك تعرفو علاش؟؟؟؟؟؟؟؟؟؟؟


و من بعد ديري الطبقة تاع الايس كريم ذوق الفراولة فوق الطبقة الاولي و مشيها فوقها غير بالشوية حتى تغطيها

و الان غطي الطبقتين بالبلاستيك و حاولي تسوي الايس كريم مليح تزيدي تكبريه البلاستيك راح يساعدك طبعا
و دخلي البلاطو تاعك في المجمد انا عندي مجمد كبير و الي ما عندهاش تقدر دير بلاطو صغير

و هاذ المرة لازم تصبري و تنتظري ساعة كاملة حتى الايسكريم يبرد بالصح مالازمش يجمد
كي تكمل الساعة تجبدي البلاطو وترولي الايس كريم تاعك بمساعدة البلاستيك
يعني هو الي يساعدك باش ترفدي الايس كريم و تروليه بكل سهولة انا في الحقيقة كنت متخوفة من هاذ المرحلة حتى تتحصلي على سويس رول كيما هاذا

كي كملنا هاذ المرحلة معناها نجحنا
رجعوها للمجمد لازم تبقى مدة 3 سوايع على الاقل
للتزيين جيبي 2 دانيت شوكولا
زيدو معاهم 3 مغارف كبار بودرة الشونتيي و طلعو بالباتور حتى نتحصلو على كريمة ثقيلة و اذا ما ثقالتش زيدو الكرام شونتيي حت ى تثقال
نغلفو بيهاla buche و نديرو خطوط بالفرشيطة و الكريمة الي بقات نديروها في لابوش ادوي و نزينو بيها
هنا مسألة ذوق و هاهي
la buche تاعنا واجدا

هاذ لابيش جات كبيرة تقدري ديري نصف الكمية انا درت كاس حليب وعلبة فلون و50غ شونتيي في كل طبقة

عند التقديم قطعيها و قدميها لضيوفك او لعايلتك و راسك مرفوع
شوفو شكلها رووووووووووووووعة

انشاء الله تكو عجبتكم الوصفة و نكون وفقت في الشرح
و انتطرو مني مفاجأ اخرى دائما في مع الايس كريم
ما تنساوش التقييم و دعوة خير تكفيني
سلاااااااااااااااااااام