[حياتي نبع امل]

انا اليوم جربت سميوسك جاتني فويتي ومقرمشة هايلة درتها من وحد المنتدى
3كاس فرينة الكاس يكون تاع القازوز الكبار 3فناجل صغار زيت خمارة تاع الحلوى وملح ولمي بالماء تقريبا 3فناجل بلي وشوفي حتان تتلم. طرية خليها ترتاح ربع ساعة
من بعد اقسميها على 2 حليها رقيقة رقيييقة ورشيها بالمايزينة كمية مليحة وروليها وزيري شوية ووقطعيها مربعات متوسطة وحطيها في صحن فيه شوية زيت وخليها ترتاح ربع ساعة
نفس الخطوات مع العجينة اللي بقات
بعدما ترتاح احكمي القطعة وحليها بالطول نفس طريقة الحنيفيات. حليها مستطيل رقيق وحطي الفرماج واطويها كيما الصامصة او كيما المونشو
الفرماج يمكن تبليه بالتوم او المعدنوس او الزعيترة او الاكليل
حطيهم في بلاطو غير مدهون واطليهم بصفار البيض مع شوية حليب
اشعلي الفرن وحطي السنيوة بعد 5د نقصيلو وخليها تطيب من التحت تم حمريها من الفوق
تجي بنينة ومورقة من الداخل توالم مع المشروبات
يمكن تغيير الحشو حسب الموجود