المساعد الشخصي الرقمي

مشاهدة النسخة كاملة : حملة من ناس الشرق على ناس الغرب


ام ظافر
2011-04-28, 12:46
:dj_17: لاحظت في الغرب الجزائري خاصة المدن الداخلية منه ما يطيبوش لا شخشوخة ولا رشتة ولا تريدة ولا تليتلي ولا دويدة ولا شخشوخة الظفر ولا اي نوع من المعجنات الي في الشرق ويكتفون الا بالكسكس فقط
وكل ما طهيت اي نوع يعجبهم ويطلبو الطريقة وخاصة الرجال اصدقاء زوجي يروحو لنساهم ويقولولهم لازم تتعلمو هذه الاطباق ( لانه كاين فرق كبير بين نوع اطباق الشرق واطباق الغرب ما يتشابهوش خلاص ) كنوع من التغيير واكتشاف الجديد
وكنت زمان نجيب التليتلي معايا بالكارطونات ليهم لانه ما كانش يتباع لكن الان راهو يتباع في الغرب والمعجنات الاخرى راهي مشروحة بالتفصيل في المنتدى وانا متاكدة انهم كي يجربوهم ماراحش يستغناو عليهم وبدل ما يطيبو غير الكسكس في المناسبات راهم يكون عندهم الاختيار بين باقي الاطباق البنينة والزاكية والاقتصادية مثل الكسكس تماما
يعني راني متمنية من ناس الشرق يساعدوني على ناس الغرب حتى يعود كل بيت في الغرب يعرف الشخشوخة والتليتلي والتريدة والرشتة و............وبدل ما يرجعلك زوجك ويقولك كليت ماكلة عمري ما كليتها خليه يقول كليت الاكلة الي تعلمتيها ودرتيهالنا من قبل
نسبة 95في المئة من ناس الغرب ما يعرفوهمش في الاصل وكنت كي ندخل للحانوت نطلب التليتلي يقولي ما نعرفوش وكي نشرحلو يعطيلي شربة لسان الطير ( لسان العصفور الي تكون مسطحة ) وماهياش التليتلي
راني نتحدث على السكان المحليين ما نتحدثش على الي تعلموها من احبابهم ومن التلفاز ومن النات و......يعني شفت احبابي من النعامة ومن تلمسان ومن افلو ومن سعيدة ومن وهرن ومن سيدي بلعباس ومن تيارت ما يعرفوش معجناتنا وكي تعلموها حبوها وضموها الى اطباقهم اليومية المفضلة لديهم
هذا ما نقصد بالحملة حملة الخير على ناس الغرب راني عايشة في وسطهم (10سنين ) ونحبهم ونتمنالهم غير الحاجة الزينة ونتمنى ولا زوجة ولا ام ولا اخت يرجع زوجها او ابنها او اخوها ويقوللها كليت اليوم ماكلة ما نعرفهاش بل يقوللها غدوة راني عارض واحد من ناس الشرق ديرينا شخشوختهم ولا تليتليهم

smilingghost
2011-04-28, 13:55
بارك الله فيكي أختي ام ظافر و الله غير حاجة مليحة انك تفكري بهذه الطريقة و اللي اكيد راح تجيب نتيجة و يستفادو منها اهل الغرب
واحنا معاهم بالتأكيد.
الف شكر ليك و تشرفت بمعرفتك.

هم كريم
2011-04-28, 14:06
انا من الغرب الجزائري من وهران و كلامك صحيح اختي هنا في الغرب منعرفوش اكلات الشرق اتكلم عن نفسي تعلمت الشخشوخة الضفر و التليتلي من النت من عند حباباتي تاع اللمة حفضهم الله وراني نديرهم عجبوني بزاف عجبوا ولادي بصح عندي مشكلة مع زوجي ميحبش العجائن والله يا اختي نهار الي ندير اكلة من مثل الشخشوخة ولا التليتلي هداك النهار عيد عندي
ربي يحفضك اختي و يكثر ن امتالك تحياتي
اختي انا التليتلي نديره بلسان العصفور ادا عندك التليتلي الي راكي تقولي عليه ارجوا منك تصوريه و توريهلي ادا امكن

ام رنا
2011-04-28, 14:06
بارك الله فيك انا عن نفسي كلما يجوني ضيوف من ناس الغرب نطيبلهم شخشوخة او تليتلي او ملوخية باش يعرفوها ولكن في الاول لقيت صعوبة بزاف مايتقبلوهاش ومايحبوش اكلات الشرق متلا ههههههههههههههه جولي ضيوف من شلف كي طيبتلهم الشخشوخة واكلات عنابية هههههههه قالولي ماكلتكم مش مليحة ماكلتنا خير بزاف

mchimcha
2011-04-28, 14:13
ana chlfia w rayha nsekon fechar9 w net3alam kamel hadhou eloklat mais ma rayhach nesmah fet3am hhhhhh oklat eldjazayrin kamlin

mchimcha
2011-04-28, 14:14
eracheta hena chelafa ndirouha

mchimcha
2011-04-28, 14:15
ma na3arfouch elmoulikhia

ياسمين177
2011-04-28, 14:33
اختي راكي غالطة انا من الغرب ملي نعقل في دارنا نطيبوا الرشة والتليتلي والشخشوخة عندنا عدة انواع تاع الكسرة وتاع التمر والهرماس وتاع الرقاق اي المسمن ليجي ورقة فوق ورقة نقولولو رقاق الا شخشوخة الظفر لكنا منعرفوهاش حنا نديروها في دارنا لكن بطريقة اخرى ولذيذة جداا لاني انا شخصيا نخدم لفطير في داري تاع شخشوخة الظفر
ودرك راها معروفة شخشوخة الظفر في الغرب بزاف يديروها
نظن انا كاين ليميعرفش هذه الاكلات مشي الغرب كامل لان الغرب فيه مدن بزاف كل مدينة وطيابها او كاين ميحبش ياكلها
تحياتي

ام ظافر
2011-04-28, 17:02
اخواتي من الغرب راني ما قصدتش الاساءة لناس الغرب راني تكلمت من واقع تجربة 10 سنوات في الغرب وما زالني عايشة فيه وقليل جدا وين نسمع بواحد او اثنين الي يعرفهم وطبعا لكل قاعدة شواذ هذا ما يعنيش بلي منعدمين كاين الي يعرفهم من جارة قديمة او نسابهم او حبابهم او......... ولكن تحدثت على السواد الاعظم من الغرب ما يعرفهمش وبدأ شيئا فشيئا يتعرف بيهم
اما الاخت الي تسأل عن الفرق بين التليتلي ولسان العصفور نقوللها بلي لسان العصفور مخصص للشربة وتكون حبتو مسطحة اما التليتلي تكون حبتو مبرومة وصغيرة مثل الروز ( واحيانا حبتو اقل من حبة الروز بكثير مثل نوع معجنات عمر بن عمر رائعة ) وكل ما تفوريه يبدأ يكبر حتى يوصل الى شكله المعتاد الي تكون حبتو لطيفة ماهي كبيرة ماهي صغيرة ماهي ملبزة (يعني ماهيش مسطحة) وكي تجمريه في المرق ما يتعجنش خلاص

merieme hassi
2011-04-28, 17:04
ربي يحفظك علي هدي المبادرة حنونة
نتكلم عن نفسي
انا تعلمت هدا النوع من جيراني و من منتدي اللمة و من حورية المطبخ
ولكن للاسف في عائلتي ميحبوش هدا النوع من المعجنات
من عاداتنا نعملو الرقاق و هو يشبه الشخشوخة البسكرية
واما التليتلي و الشخشوخة الظفر و الرشتة ميحبوهمش الاهل ديالي
اما انا شخصيا نحب الرشتة كليتها عند حبيبتي قبايلية و عجبتني بزااااف
و راني نشوف في العضوات كيفاش يخدموها و ان شاء الله نجربها
بارك الله فيك يا الحبيبة الي راكي تخمي فينا

blsamira
2011-04-28, 18:03
كلامك كلو صحيح ياختى
احنا عندنا منديروش هذى الاكلات ديما كى يكون ضيف نديرو الكسكس
وتليتلى تعلمتو من النيت على جال بابا ضاقو عند الجران من بجاية وعجبو بزاف
عدت ديما نديرولو

nadiem
2011-04-28, 18:36
ام ظافر العزيزة هيا انضمي معايا باه تحطيلنا الاكلات تاع ناس الشرق وكل وحدة تحط واش مشهور عندهم باه تعم الفايدة

http://www.djelfa.info/vb/showthread.php?t=581548

الخامسية
2011-04-28, 21:15
انا من الغرب يا اختي و بالذات من معسكر
هذه الاكلات احن نديروها فقط الاسماء تتغير
نديرو المسمن و نديرو الرقاق و نديرو الترشتة التي تسمونها انتم الرشتة نفس العجينة و نفس التقطاع لكن تختلف فقط في كيفية طهوها
نديرو البركوكس وهو نوع من الكسكس لكن غليظ قليلا و نديرو الكسكس المعروف

merieme hassi
2011-04-28, 21:15
ام ظافر العزيزة هيا انضمي معايا باه تحطيلنا الاكلات تاع ناس الشرق وكل وحدة تحط واش مشهور عندهم باه تعم الفايدة

http://www.djelfa.info/vb/showthread.php?t=581548


نعم يا الحنونة وحدو موضوعكم في موضوع واحد و ان شاء الله المشرفة تثبته باش نستفادو الكل
بارك الله فيكم

بتول8
2011-04-29, 13:29
عن تجربة انا كنت قاطنة بمدينة بشار و لا يعرفون سوى الكسكسي و حتى لما نتسوق لا اجد التريدة و شخشوخة الظفر و الانواع المعروفة بولايتي الاصلية

طائر النورس مغتربة
2011-04-29, 19:22
انا من الغرب الجزائري غليزان مقيمة بفرنسا تعرفت على بزاف بنات من الشرق فعلا عندهم اطباق كثيرة وتشهي لاكن الحاجة لي مانحبهاش في ه>ي الاطباق انو يستعملو الحار بزاف ومايديروش التوابل كيماحنا فلغرب مثل راس الحانوت

merieme hassi
2011-04-29, 22:06
انا من الغرب الجزائري غليزان مقيمة بفرنسا تعرفت على بزاف بنات من الشرق فعلا عندهم اطباق كثيرة وتشهي لاكن الحاجة لي مانحبهاش في ه>ي الاطباق انو يستعملو الحار بزاف ومايديروش التوابل كيماحنا فلغرب مثل راس الحانوت
السلام عليكم
شفتي حنونة شعال ياكلو حار
الله يبارك
انا حبيبتي كي ترسلي حاجة من عاداتهم نقولها متعمليش الحااااااااااااااااااااااااااار
خلاص توالفوني
عاداتنا زوينة بزاااااااااااااااااااااااف

ام ظافر
2011-04-30, 14:51
يا اختي طائر النورس ربي يرد غربتك على خير وانت اختي مريم صدقيني الحار راهو يرجع لذوق كل واحد ما لازمش نحتموه على الاخرين لانه مثل الملح والتوابل كل واحد وطريقة طيابو كاين الي يكثر وكاين الي ما يكثرش لان الحار بزاف يضر المعدة
ولكن على العموم رانا نوعو فيه حتى هو كاين الهريسة الحمرة كاين الفلفل المرقد كاين الطرشي كاين اربع فصول كاين الهريسة الخضرة كاين قلب السردوك وهذا اشدهم حااااار جدا مشهوريين بيه ناس بسكرة

ام ظافر
2011-09-28, 10:53
هل من جديد في هذا الموضوع خاصة ان الكثيرات حطو طريقة الرشتة والشخشوخة

HADIL146
2011-09-28, 13:12
مشكورة على الفكرة
حابةمنك ديريلهم شربة الفريك كل مرة يسقسيوني عليها
http://data0.eklablog.com/anastasia-59590/mod_article658982_1.gif

ام ظافر
2011-09-28, 14:03
مشكورة على الفكرة
حابةمنك ديريلهم شربة الفريك كل مرة يسقسيوني عليها
http://data0.eklablog.com/anastasia-59590/mod_article658982_1.gif

اختي هذا الرابط فيه كلشي http://www.djelfa.info/vb/showthread.php?t=581548&highlight=%D3%C8%C7%CD+%C7%E1%D3%DD%D1%C9

moslihe29
2011-10-01, 11:21
موضوع رائع اختى الحبيبة انامن الغرب من معسكر وكيماقالت الاخت الخامسية الى يوجد في الغرب يوجد في الشرق لكن باسماء مختلفة وطرق تحضير مختلفة ولكى نفيد ونستفيد وننوع نرجومناخوات الشرق يضعولنا الاكلةوطريقة التحضير بالتفصيل والصور وشكرا

أم نوفل2010
2011-10-01, 17:42
اختي ام ظافر بارك الله فيك على الموضوع لكن لكل منطقة في الجزائر عاداتها وتقاليدها .والجزائر واسعة وشاسعة 0وياريت لو طرحت موضوعك علىاساس هيا نتبادل عاداتنا في الاكل بين المنطقتين مشكوووورة للعلم انا من منطقة محايدة منالوسط.

جزائرية
2011-10-17, 21:48
انا من الشرق ونحي ناس الغرب

imy88
2011-10-19, 02:17
عدي حاجة مليحة نتعلمو ماكلات بعضانا ادزاير راهي كبيرة وعريضة مليح واحد اوري الواحد كما احنا في العاصمة تقريبا نعرفو كامل هدو العاصمة فيها كامل الاجناس وناس اورو البعضاهم

remadna
2011-10-19, 10:09
الله يبارك ام ظافر موضوع مفيد
حنا في بسكر تقريبا نعرفو كامل الأطباق تاع الشرق و الغرب و كل شئ يجرب
والآن اصبحت كل العجائن تباع: الثريدة ، شخشوخة الظفر ، الرشتة و كلها نطبخها في الأيام العادية أو الأعراس ، كاين اللي يطبخها حمراء و كاين اللي يديرها البيضاء
بالإضافة الا انواع الكسكس (البربوشة) تاع البساكرة:
العيش ( يشبه الكسكس لكنه كبير جدا يطبخ مثل بالمرق مثل الشربة يجي أحمر حار بالقديد الحمص و الفول اليابس و الترماس و التوابل) لذيييييييييذ ينحي مرض الزكام
بربوشة مشخشخة (متوسطة الحجم تجي مجمرة مثل التليتلي لكن حمراء و حارة بالبصل) ,,, عندنا مدة ما كليناهش في الدار
بومفور ( كسكس خشن كثيرا يفور مثل التليتلي بالصلصة الحمراء الحارة فيها جزر و كرنب و بصل مقطعين صغار),,, أمي عندها مدة لم تطبخه، آكله في دار خالتي كي نسخف عليه
بربوشة الحليب (بالكليلة و الحليب و الفول اليابس و الحمص و البطاطا و الجريوات)
بربوشة الخضر أو الخضرو الكابويا (العادية للدار)
بربوشة منظمة ( للمناسبات للأعراس و فطور العروسة بالبطاطا و الجرويات و اللحم أو الدجاج المحمرين و الزبيب)
بربوشة بيضاء بالخضر ( تشبه تاع العاصمة)
بربوشة البرزقالة ( حشيشة تباع في السوق في الشتاء مليئة بالفوائد)
بدون أن انسى المسقية البسكرية التي تسقي بالرقاق:
تشيشة مرمز ( بيضاء تجي بطماطم حب و ليمون.... ) وضعت وصفتها بالتفصيل في قسم المعجنات
تشيشة فريك ( حمراء تجي بطماطم حب و علب مع القديد و الحمص و الفول اليابس) ذوقها يشبه الفريك لكن ألذ
حسوة ( حمراء تجي بطماطم حب و علب اذا حبيتي و فول يابس و ليمون بالإضافة الى توابل خاصة كالقنطس و في الأخير ضفي شوية فرينة) كاين حسوة بالفرينة أو الدقيق المتوسط، ، تأكل و حدها بدون رقاق لمريض الزكام فعالة جدا جدا
الشخشوخة البسكرية المنظمة (تشبه البربوشة المنظمة تصلح للمناسبات و الأعراس و فطور الصباح العروسة)
شخشوخة الخضر ( بالخضر و اللحم غير ضروري فيها لكن اذا متوفر ديريه)
شخشوخة الكابويا (بالبطاطا و الكابويا و اللحم غير ضروري لكن اذا متوفر ديريه)
المرخوس ( مرقة حمراء بطماطم حب و علب نصفها بصل و التوابل الخاصة به ذوقه يشبه المحاجب ، اما الرقاق تاعو خشن ياسر يشبه الرخساس و يفتت صغير)
(الكسرة تاع مرخوس) الرقاق الخشن ياسر يشبه الرخساس و يفتت صغير تجي به 3 أكلات رئيسية ضرورية و محبوبة جدا عند البساكرة:
بطوط (طماطم حب و علب و ليمون و كسبر و توابل خاصة مع القليل من الماء الساخن تخلط نيئة بالكسرة)
بومهراس (يشبه البطوط يعمل في مهراس خشب خاص به)
بومرسة ( كسبرة خضراء طماطم حب فقط كيليها بكيلة كسرة تمرس باليد) لذيييذة
و المحاجب ايضا ضرورية
كل هذه الاكلات تاكل بالزيتون و الفلفل المرقد الا البطوط و البومهراس و البومرسة و العيش
و كلها مفيدة جدا للصحة فيها خضر و توابل للشفاء خاصة البطوط و الحسوة تشفي من امراض الزكام ماعدا الشخشوخة و البربوشة المنظمين تاع الضيوف ثقال بالدسم و اللحم

بالإضافة الى انواع الشربات البيضاء و الحمراء و البقوليات

ملاحظة: نحن في الدار نستبدل طماطم حب بالليمون حتى في المحاجب، و الحار لا يخلط في البرمة الا الفلفل الاخضر المغلوق يوضع في الاخير ، كاين في الدار الي ما ياكلوش الاكل الحار

طلب صغير :o: ما تحشمونيش بطلب الوصفات لأني لا اطبخ كثيرا في الدار و عندما اطبخ لا اعرف الكيل :1: و كاين وصفات كالعيش لم نطبخها منذ 3 سنوات و البربوشة المشخشخة منذ أكثر من 6 سنوات

zahia05
2011-10-20, 15:18
السلام عليكم والله يعطيك الصحة أختي على هذه الإلتفاتة حنا بلاد وحدة و ما نعرفوش الأكلا نتاعنا لكن نعرفو المعكرونة اللازانيا الفريت البايلا...... أنا من الشرق لكن تعلمت الكرانتيتة و الحريرة و بالنسبة للحلويات حماتي من العاصمة و ناس العاصمة الله يبارك معروفين بالحلويات أشكال , أنواع كل حلوة تشهي على الاخرى و زوجي مولوع بالحلويات العاصمية و أنا لما جيت عندو ما نعرف إلا مقروذ التمر و الكروكي لكن حماتي الله يحفظها و يشفيلها بنتها وقفت معايا و علمتني معضم الأكلات العاصمية و كل الحلويات لذا أنا نقول لكل الأخوات أن الطبخ متعة بحث وفن ونولف أسرتي يستمتعوا معايا في إكتشاف الأكلات الجديدة الجزائرية خاصة لي نسمع بيها نجربها و نولفهم أيضا ماياكلوش الوجبات السريعة من الخارج
و الأكلات الجزائرية كلها صحية و مقوية 100/100



http://forum.mn66.com/imgcache2/595694.gif

mira27
2011-10-21, 23:44
شكرا على المبادرة اختى. لكن ما قلته لا ينطبق على الجميع


الرشتة.الثريد.شخشوخة الظفر.البركوكس.....البراج. خبز الشرق....نعملوهم كلهم




حتى القوارط و المقطفة للشوربة

oum rahma
2011-10-22, 18:47
السلام عليكم

فكرة جميلة جدا أنا من الشرق نحب الأكلات التقليدية جدا من الشرق والغرب والشمال والجنوب

خاصة المحاجب ( كسرة شحمة ) وكسكسي مْكَسْبَرْ ( كسكسي خشين شوية نطيبوه بمرق أحمر بالقديد -أي الخليع-

والبطاطا والجريوات و الفول اليابس والجزر٠ كي يطيب نفيضو الحليب ونضيفه للمرق ثم نسقيوه ونأكله يم يم يم يم )

والشخشوخة خاصة البسكرية يم يم يم يم

أيضا الكسكسي بالمرق الأبيض هذا تاع لعراس يحب اللحم ياسر وما فيهش الخضرغير الجريوات والحمص( بالكسكسي الرقيق)يميم يم يم يم

لا تقولوا عني أكولة :D:D:D:D


http://www.nsaayat.com/up/uploads/nsaayat2f665305e7.gif (http://www.xxxx.com/) http://www.lakii.com/vb/smile/21_93.gif http://www.alfrasha.com/up/6622218891536678956.gif http://www.alfrasha.com/up/1503556681292783965.gif

جمانة1987
2011-12-05, 11:50
انا ايضا هذه امنيتي

ياربي اني راضية
2011-12-05, 13:55
الف شكر اختي ام ظافر على الالتفاتة الرائعة وانا من الوسط نعرفوا الرشتة والتليتلي ونستعملوا لسان الطيير هدا كنت دايرة مكانش فرق كيف كيف و نشكرك راكي شرحتيه نطيبوا شخشوخة الظفر و شخشوخة الرقاق بصح التريدة مانعرفوهاش سمعتها في المنتدى فقط ربي اجازيك هكدا نعرفوا طياب بعضانا ونتعلموا

ام ظافر
2011-12-06, 11:50
مشكورين على مروركم الكريم
واي وصفة راكم تلقاوها هنا في هذا المنتدى بالشرح وكذلك الصور

نسرين سامي
2011-12-07, 12:14
سلام انا من آفلو من الوسط عندك الحق التنويع مليح بصح حنا كي جربناهم انا يعجبوني لكن ابي وخوالي والله مدخلتلهم راسهم صح تعجبهم بصح يقولولك ماكانش خير من الطعام بالمرقة الحمرة

جزاائرية
2011-12-07, 22:47
شكرا ام ظافر مع اني لست من هواة المعجنات باشكالها وانواعها

ام محمد ميدو
2011-12-21, 09:50
http://smile.6vv.com/smile_albums/45/www.hh50.com-Images-Islam-0453.gif (http://smile.6vv.com/)

شكرا ام ظافر على الموضوع http://smile.6vv.com/smile_albums/39/4ca43ff3a0.gif (http://smile.6vv.com/)
الحمدلله انا نسكن في الجلفة يعني في وسطكم كامل الشرق و الغرب الشمال و الجنوب موقع استراتيجي http://smile.6vv.com/smile_albums/2/www.hh50.com-Smile-Laughing-Happy-Freaks-Laugh-1395.gif (http://smile.6vv.com/) http://smile.6vv.com/smile_albums/2/www.hh50.com-Smile-Laughing-Happy-Freaks-Laugh-2035.gif (http://smile.6vv.com/) و لذلك الحمد لله نعرف كامل هذو الاكلات اللذيذة http://smile.6vv.com/smile_albums/2/www.hh50.com-Smile-Laughing-Happy-Freaks-Laugh-1317.gif (http://smile.6vv.com/) وفوق هذا كامل عندي عمتي و ايضا عمي سكنو في الغرب و سكنو في الشرق و جابتلنا عمتي و مرت عمي و صفات كثيرة بنينة و جديدة على منطقتنا
http://smile.6vv.com/smile_albums/45/www.hh50.com-Images-Islam-0099.gif (http://smile.6vv.com/)

ammouna
2012-01-01, 13:04
merci a3tik ssaha ala almawdou3 ana personnelment 3jabni w yssa3adni pask je ss de constantine et mon fiancé de belabbass mai tfidni tani na3ref leur plat ta3 algharb bech net3alemhom w bien sur ntayeblhom tyabna ta3 chark

امينة تيارت
2012-01-01, 14:02
سلام انا من آفلو من الوسط عندك الحق التنويع مليح بصح حنا كي جربناهم انا يعجبوني لكن ابي وخوالي والله مدخلتلهم راسهم صح تعجبهم بصح يقولولك ماكانش خير من الطعام بالمرقة الحمرة

و انا مع راي نسرين فقد تعلمت الكثير من وصفات الشرق لكن دارنا مابغاوهمش و في نفس الوقت حنا الغرب مانديروش غير الكسكس نديرو الرقاق بالمرقة و الخضار...الرشتة ..العيش و لا البركوكس .............كاين اكلات نختلفو فيهم فقط في الاسم لكن الشرق تعتمدو بزاف على العجين بالمرقة و الوالدة دايما تقولي بلي هذ الاكلات كنا نديرهم بكري.....شكرا اختي على الموضوع و نتمناو تحطيلنا وصفات جديدة اهلا بكل ما هو مفيد لكن لي تحفظ نتمنى من اختي انك تغيري عنوان موضوعك علاش حملة لي يقرا يحسب الغرب مايطيبش مع العلم انو الغرب ايضا يتميز باكلات عديدة عدا الكسكس شكرا اختي تقبلي تحياتي:19:

لمستغانمية
2012-01-01, 14:09
انا ثاني من الغرب لالا بصح ما نعرفوش غير الكسكس برك بل نديرو البركوكس و الرقاق الى هو التريدة و المسمن و الرشتة

بني بلعيد
2012-01-01, 14:23
في الشرق الجزائري وخاصة مدينة قسنطينة ونواحيها ، تعتبر هذه الجهة مهد الأكلات بجميع أنواعها ، ومن لم يعش في هذه المدينة لايعرق قيمة وتعدد الأكلات ولو ذكرتها لكم لما اتسعت هذه الصفحة لها ، لهذا أرى أن إخوننا في الوسط والغرب معذورين في ذلك ، والإنسان عدو لما يجهل وسأذكر لكم بعضا من هذه الأكلات على سبيل المثال لا الحصر وهــــــــــــــــــــي :
الشرية فريك ، الدولمة ، الشخشوخة ، الدوبارة ، التريدة ، طاجين لحلو ، شطيطحة لحم ، بوزلوف ، لمثوم ، التليتلي ، الدنجال محشي ، والقائمة تطول ...........إلخ

ام ظافر
2012-04-12, 11:29
و انا مع راي نسرين فقد تعلمت الكثير من وصفات الشرق لكن دارنا مابغاوهمش و في نفس الوقت حنا الغرب مانديروش غير الكسكس نديرو الرقاق بالمرقة و الخضار...الرشتة ..العيش و لا البركوكس .............كاين اكلات نختلفو فيهم فقط في الاسم لكن الشرق تعتمدو بزاف على العجين بالمرقة و الوالدة دايما تقولي بلي هذ الاكلات كنا نديرهم بكري.....شكرا اختي على الموضوع و نتمناو تحطيلنا وصفات جديدة اهلا بكل ما هو مفيد لكن لي تحفظ نتمنى من اختي انك تغيري عنوان موضوعك علاش حملة لي يقرا يحسب الغرب مايطيبش مع العلم انو الغرب ايضا يتميز باكلات عديدة عدا الكسكس شكرا اختي تقبلي تحياتي:19:

اكيد اختي الغرب يتميز بطبخو ونكهاتو الخاصة وهذا امر لا ينكره الا جاحد وانا كتبت موضوعي هذا بعد تجربة 11 سنة عشرة بين ناس الغرب ومازالني ساكنة بيناتهم لحد كتابة هذه السطور
ناس الغرب على سلامتهم ماعندي مانقول فيهم وفي ماكلتهم ولكني فعلا لاحظت ان اطباق كثيرة جدا ما كانوش يعرفوها اما الان بعد ان ظهرت الانترنات والمنتديات اصبح الواحد في الغرب يطيب التليتلي وفي الشرق يطيب الكارانطيكا
كثر خير المنتديات راهي عرفتنا بتنوع الجزائر اكثر وكلامي اختي مافيهش اسائة لناس الغرب راني نقولها ونعاودها

نيفرتيتي.
2012-04-12, 11:58
يعطي ك الصحة اختي على هذه المبادرة احنا تاع الشرق ذمعروفين بالمعجنات الشخشوخة بانواعها والبركوكش كيما تقولو حنا ماشي البركوكس والملوخية بصح درك بحكم العائلات تتنقل من الشمال للجنوب للشرق للغرب وتعيش ثم من 3الى4او5 سنوات الناس كامل تتعلم تبقى في الاذواق كل واحد وذوقه ثان كاين اللي مايحبش يشتعرف الا بماكلتو كيما الناس اللي نعرفهم بصح انا وزوجي واولادي يبغو بزاف الاكلات تاعنا تاع الشرق وين نروح ندي معايا ملوخية وتليتلي وشخشوخة الظفر ........الخ حتى مرة في وهران قلت لمولا الحانوت مدلي التليتلي مافهمنيش قريب ساعة وانا نفهم فيه حتى لقيت لسان الطير في الحانوت باه فهمني ومرة في بشار حوست على الدويدة ثان مافهمنيش حتى لقيتعا وقالي راهي الشربة لانهم يطيبوها غير شربة ومايفوروهاش

نيفرتيتي.
2012-04-15, 13:34
واش ناس الوسط طيابهم كيفاه كيما تاع تاشرق ولاكيماتاع الغرب

gatta.annabia
2012-04-15, 15:12
:19:بارك الله فيك انا عن نفسي كلما يجوني ضيوف من ناس الغرب نطيبلهم شخشوخة او تليتلي او ملوخية باش يعرفوها ولكن في الاول لقيت صعوبة بزاف مايتقبلوهاش ومايحبوش اكلات الشرق متلا ههههههههههههههه جولي ضيوف من شلف كي طيبتلهم الشخشوخة واكلات عنابية هههههههه قالولي ماكلتكم مش مليحة ماكلتنا خير بزاف


شكون هذا اللي ما يعرفش طعمة فمو يحكي و يقول معجبتنيش ماكلة عنابة:mad:
يا اما اليدين ماتعرفش و الطياب مش في كارو يا اما الطياب العزيز الغالي تاع عنابة اللي استطعموعندك ماعندوش ذوق في الماكلة:1:
ماكانش واحد ذاق الماكلة العنابية الحرة البلدية و قال مش مليحة
وهو اللي يجي يسكن ولا يولد في عنابة يكون عنابي وعارف بعوايد طيابها لا يا اختي
جيبي ضيوفك هنا و شوفي بنات البلاد و حراير عنابة و ذوقي طعامة صويبعاتهم العزيزة
حبيبتي قداه من وحدة اتزوجت في الغرب و اهل راجلها حارو
في عوايدنا اللي ماكانش لا في الجزاير لا في العرب
طيابنا وحدو و اعراسنا وحدهم
ونزيد شئ طياب قسنطينة زادة ماعندنا مانقولو فيه طعم و ذوق عندهم حاجات كيما حنا
و ماعندناش غير المرق الابيض عندنا الاحمر و المرق الحمرا
مش الناس الكل تعرف تطيب الملوخية و القناوية و الخمورية و الشخشوخة عادة حمرا و البوراك العنابي و الرشتة بالدجاج
بالنسبة لللاخت اللي قالت الحار نعم نديرو الهريسة ونخدموها في الدار مفلفلة تقتل ههههههههههه و لكن مش كل حاجة نديروها حارة
شخصيا ماناكلش الحار ياسر انا
و الجاري بالقرصة و الجاري الابيض بالبنادق و الجاري بالفريك وهذا يطيب لازم في برمة فخار و طماطم كعب مش مصبرة
التليتلي و المحور بالزعفران و الكسكسي عندنا اشكال وانواع
بالخضر و الكسكسي بالحوت و الكسكسي العراسي و المسفوف و الكسرة الرخسيس و المطلوع و خبز الكوشة و المعدنوسية
و القريتلية بالبنادق و المقرطفة و النواصر و الفطير و الظولمة بانواعها تاع الزيتون و غيرها المحشي فلفل محشي و القرنون المحشي و البرانية باللحم والكتف المحشي و الحوت في الكوشة و الطواجن و شباح الصفرة و المرقة الحلوة و الدويدة المطبوخة بالدجاج و طاجين بونارين و البطاطا في الكوشة و البطاطا قرنون
وطاجين الرخام و عين السبنيولي و الحميص
و السلاطة المشوية و الجلبانة بالقرنون و الخ و الخ و اذا نسيت اكلة فكروني يا بنات عنابة:1:
نجيو للحلو عندنا المقروظ سلطان السينية و البقلاوة العنابية تكون بالجوز اكثر معروفين حنا بيها و تكون على زوج فراشات يعني طبقتين و الغريبة تذوب في الفم و قرن غزال باللوز و الكعب كبار يكون بالسكر الارطب و كاين اللي يديرو من غير سكر يزينو برك باللوز و طمينة اللوز و مقروظ اللوز و مقروظ المقله و المقرقشات و عمامة القاضي و الصامصة وخبز الباي و نعملو معجون السفرجل و العنب معروفة عنابة بيه و نقطرو الزهر و الورد ونخدمو بما الزهر اكثر خلافا على قسنطينة اللي يخدمو بماء الورد هاذو تاع زمان المعروفة بيهم عنابة اما الباقي حلويات جديدة
حكيت عن الحلويات اللي تاع بكري و اللي زمان تلقاوهم في كل دار و الطمينة بالغرس و الرفيس الزيراوي و المشلوش و المسمنات و التالاشت بالعسل و الغرايف و البراج في الربيع
واللي عنابية و بنت بلاد تعرف الطياب اللي قلت عليه
طياب عنابة المخير في الشرق و في الجزاير:19: بشهادة الطباخين اللي عملو هنا في عنابة و جابو اطباق من وهران و سعيدة و تلمسان اقصد الفنادق و المعارض
رحنا داخل الجزاير و خارجها الغرب عجبهم طيابنا و الوسط حبوه و الجنوب عجبهم و حتى في الخليج جاو لعراسنا و اتزوجو ببناتنا و هبلو على عاداتنا و لبستنا الاصيلة وذهبنا حتى الذهب ماشفتش في الجزاير كاملة عروسة او مراة تلبس الذهب كيما عنابة و طيابنا عزيز وغالي
المهم اللي تحب اي اكله عنابية تطلب وحنا في الخدمة
الشكر الجزيل لام ظافر صاحبة الموضوع
وليس قصدها او قصدنا ان الاكل تاع ناس الغرب موش مليح بالعكس احنا جزايريين ونفتخرو بالشرق والغرب و كل ربوع الوطن الحبيب
و مافيها باس لو نتعلمو من بعضانا
و في الاخير الطبخ ذوق و فن وكل واحد يضرب على اصله و بلاده:19:
عجبني رد الاخت رماضنة كفت و وفت على اكلات منطقتها و ياريت كل وحدة تحكي عن طبخاتهم و تفيدنا و يصير تبادل شرقي غربي وسطي جنوبي هههههههههههه

نيفرتيتي.
2012-04-15, 18:27
:19:


شكون هذا اللي ما يعرفش طعمة فمو يحكي و يقول معجبتنيش ماكلة عنابة:mad:
يا اما اليدين ماتعرفش و الطياب مش في كارو يا اما الطياب العزيز الغالي تاع عنابة اللي استطعموعندك ماعندوش ذوق في الماكلة:1:
ماكانش واحد ذاق الماكلة العنابية الحرة البلدية و قال مش مليحة
وهو اللي يجي يسكن ولا يولد في عنابة يكون عنابي وعارف بعوايد طيابها لا يا اختي
جيبي ضيوفك هنا و شوفي بنات البلاد و حراير عنابة و ذوقي طعامة صويبعاتهم العزيزة
حبيبتي قداه من وحدة اتزوجت في الغرب و اهل راجلها حارو
في عوايدنا اللي ماكانش لا في الجزاير لا في العرب
طيابنا وحدو و اعراسنا وحدهم
ونزيد شئ طياب قسنطينة زادة ماعندنا مانقولو فيه طعم و ذوق عندهم حاجات كيما حنا
و ماعندناش غير المرق الابيض عندنا الاحمر و المرق الحمرا
مش الناس الكل تعرف تطيب الملوخية و القناوية و الخمورية و الشخشوخة عادة حمرا و البوراك العنابي و الرشتة بالدجاج
بالنسبة لللاخت اللي قالت الحار نعم نديرو الهريسة ونخدموها في الدار مفلفلة تقتل ههههههههههه و لكن مش كل حاجة نديروها حارة
شخصيا ماناكلش الحار ياسر انا
و الجاري بالقرصة و الجاري الابيض بالبنادق و الجاري بالفريك وهذا يطيب لازم في برمة فخار و طماطم كعب مش مصبرة
التليتلي و المحور بالزعفران و الكسكسي عندنا اشكال وانواع
بالخضر و الكسكسي بالحوت و الكسكسي العراسي و المسفوف و الكسرة الرخسيس و المطلوع و خبز الكوشة و المعدنوسية
و القريتلية بالبنادق و المقرطفة و النواصر و الفطير و الظولمة بانواعها تاع الزيتون و غيرها المحشي فلفل محشي و القرنون المحشي و البرانية باللحم والكتف المحشي و الحوت في الكوشة و الطواجن و شباح الصفرة و المرقة الحلوة و الدويدة المطبوخة بالدجاج و طاجين بونارين و البطاطا في الكوشة و البطاطا قرنون
وطاجين الرخام و عين السبنيولي و الحميص
و السلاطة المشوية و الجلبانة بالقرنون و الخ و الخ و اذا نسيت اكلة فكروني يا بنات عنابة:1:
نجيو للحلو عندنا المقروظ سلطان السينية و البقلاوة العنابية تكون بالجوز اكثر معروفين حنا بيها و تكون على زوج فراشات يعني طبقتين و الغريبة تذوب في الفم و قرن غزال باللوز و الكعب كبار يكون بالسكر الارطب و كاين اللي يديرو من غير سكر يزينو برك باللوز و طمينة اللوز و مقروظ اللوز و مقروظ المقله و المقرقشات و عمامة القاضي و الصامصة وخبز الباي و نعملو معجون السفرجل و العنب معروفة عنابة بيه و نقطرو الزهر و الورد ونخدمو بما الزهر اكثر خلافا على قسنطينة اللي يخدمو بماء الورد هاذو تاع زمان المعروفة بيهم عنابة اما الباقي حلويات جديدة
حكيت عن الحلويات اللي تاع بكري و اللي زمان تلقاوهم في كل دار و الطمينة بالغرس و الرفيس الزيراوي و المشلوش و المسمنات و التالاشت بالعسل و الغرايف و البراج في الربيع
واللي عنابية و بنت بلاد تعرف الطياب اللي قلت عليه
طياب عنابة المخير في الشرق و في الجزاير:19: بشهادة الطباخين اللي عملو هنا في عنابة و جابو اطباق من وهران و سعيدة و تلمسان اقصد الفنادق و المعارض
رحنا داخل الجزاير و خارجها الغرب عجبهم طيابنا و الوسط حبوه و الجنوب عجبهم و حتى في الخليج جاو لعراسنا و اتزوجو ببناتنا و هبلو على عاداتنا و لبستنا الاصيلة وذهبنا حتى الذهب ماشفتش في الجزاير كاملة عروسة او مراة تلبس الذهب كيما عنابة و طيابنا عزيز وغالي
المهم اللي تحب اي اكله عنابية تطلب وحنا في الخدمة
الشكر الجزيل لام ظافر صاحبة الموضوع
وليس قصدها او قصدنا ان الاكل تاع ناس الغرب موش مليح بالعكس احنا جزايريين ونفتخرو بالشرق والغرب و كل ربوع الوطن الحبيب
و مافيها باس لو نتعلمو من بعضانا
و في الاخير الطبخ ذوق و فن وكل واحد يضرب على اصله و بلاده:19:
عجبني رد الاخت رماضنة كفت و وفت على اكلات منطقتها و ياريت كل وحدة تحكي عن طبخاتهم و تفيدنا و يصير تبادل شرقي غربي وسطي جنوبي هههههههههههه
اختي مانقدروش نقولو طياب عنابة المخير في الشرق والجزاير لانه كامل عندهم عادات وتقاليد لازم نحترموها مالا انانقولك انه احنا في تبسة المخيرين لا لانه ممكت اكلة من الشرق واحنا نموتو عليها الشخشوخة مثلا يجي واحد من الغرب يقولك عجينة وماناكلهاش اما احنا عندنا احسن حاجة والحريرة هوما عندهم المخيرة بالاخص كي تكون باال طماطمو بلا لحم ولازعرة احنا كون ماتكونش شربة فريك وحارة وحمرة ماناكلوهاش بالاخص في رمضان

gatta.annabia
2012-04-15, 20:18
اختي مانقدروش نقولو طياب عنابة المخير في الشرق والجزاير لانه كامل عندهم عادات وتقاليد لازم نحترموها مالا انانقولك انه احنا في تبسة المخيرين لا لانه ممكت اكلة من الشرق واحنا نموتو عليها الشخشوخة مثلا يجي واحد من الغرب يقولك عجينة وماناكلهاش اما احنا عندنا احسن حاجة والحريرة هوما عندهم المخيرة بالاخص كي تكون باال طماطمو بلا لحم ولازعرة احنا كون ماتكونش شربة فريك وحارة وحمرة ماناكلوهاش بالاخص في رمضان

والله يا اختي هذا رايي و راي العنابيات وبصفة شخصية وكل واحد حر
بحكم سفري الدائم داخل وخارج الوطن
نقدر نقلك صلت وجلت وعرفت اشيا و اتعلمت اشيا و لكن مثل عنابة مافيه للتنوع و للذوق وعدم اللخبطة و لاعطاء كل شئ قيمته بفن و ذوق
شفت الاكل الافغاني في الامارات و الاكل الايراني و الهندي في agra و goa و راجاستان
شفت الاكل المصري و العراقي و الشامي و الايطالي و المغربي و التونسي و الليبي و كيما تقولي انتي حتى تبسة و جيجل و معنية وتلمسان و بسكرة والخ والخ ومالقيتش طبخ كيما تاع بونة الجميله لاني انا احب الاصالة ومع التجديد و التحديث و لكن الاصل هو و نقلك كل مانروح بلاد نشري كتب للطبخ و لما ندخل مطعم نروح للشاف ونحب نعرف منه الطريقة و يرحبو بيا و يعجبهم الحال و انا تاني خاطر تعلمت حوايج يااااااااااااااااسر و صرت شاطرة مش غير في العنابي في كل الطبخات الجزايرية بمختلف مناطقها لاني اسئل اهل الخبرة و اصيلي المنطقة حتى اعرف الصح و الطريقة الاصليه
و نزيدك عندنا الجيران ياسر من سدراتة و سوق اهراس الكسكسي يسقيوه بالحليب مع المرقة و يديروه احمر هاذي عاداتهم و كليتو شحال من مرة في تبسة كليت الشخشوخة و الكسكسي بالخضرة و اللحم بصح ابيض
انا حماتي ربي يعيشها قسنطينية ومتربية في عنابة نموت على طيابها تقريبا نفسه مع عنابة مع اختلافات طفيفة
ومرت خويا دزيرية ماكلتها بنينة بصح الحمص مشكلة الحلو يهبل ماعندي مانقول المخير بالنسبة ليا ذوق و فن و ديكور
وعندي جارتي تلمسانية الله الله عليها حريرة زوينة و ماكلة بنينة بصح
بالنسبة للحريرة انا اعمل الحريرة الفاسية عالطريقة المغربية ومش لازم تكون حارة قرن فلفل في اخر الطياب يكفي للذوق و للبنة
جاري الفريك مانديروهش حار غير ماقتلك قرن فلفل ونعناع عالاخر للبنة
في رمضان عنابة هنا حكاية اخرى و طويلة
و تدخلي ليس بدافع الهجوم وانما بدافع الغيرة على مدينتي وحبي لها
تحياتي

نيفرتيتي.
2012-04-15, 22:30
والله يا اختي هذا رايي و راي العنابيات وبصفة شخصية وكل واحد حر
بحكم سفري الدائم داخل وخارج الوطن
نقدر نقلك صلت وجلت وعرفت اشيا و اتعلمت اشيا و لكن مثل عنابة مافيه للتنوع و للذوق وعدم اللخبطة و لاعطاء كل شئ قيمته بفن و ذوق
شفت الاكل الافغاني في الامارات و الاكل الايراني و الهندي في agra و goa و راجاستان
شفت الاكل المصري و العراقي و الشامي و الايطالي و المغربي و التونسي و الليبي و كيما تقولي انتي حتى تبسة و جيجل و معنية وتلمسان و بسكرة والخ والخ ومالقيتش طبخ كيما تاع بونة الجميله لاني انا احب الاصالة ومع التجديد و التحديث و لكن الاصل هو و نقلك كل مانروح بلاد نشري كتب للطبخ و لما ندخل مطعم نروح للشاف ونحب نعرف منه الطريقة و يرحبو بيا و يعجبهم الحال و انا تاني خاطر تعلمت حوايج يااااااااااااااااسر و صرت شاطرة مش غير في العنابي في كل الطبخات الجزايرية بمختلف مناطقها لاني اسئل اهل الخبرة و اصيلي المنطقة حتى اعرف الصح و الطريقة الاصليه
و نزيدك عندنا الجيران ياسر من سدراتة و سوق اهراس الكسكسي يسقيوه بالحليب مع المرقة و يديروه احمر هاذي عاداتهم و كليتو شحال من مرة في تبسة كليت الشخشوخة و الكسكسي بالخضرة و اللحم بصح ابيض
انا حماتي ربي يعيشها قسنطينية ومتربية في عنابة نموت على طيابها تقريبا نفسه مع عنابة مع اختلافات طفيفة
ومرت خويا دزيرية ماكلتها بنينة بصح الحمص مشكلة الحلو يهبل ماعندي مانقول المخير بالنسبة ليا ذوق و فن و ديكور
وعندي جارتي تلمسانية الله الله عليها حريرة زوينة و ماكلة بنينة بصح
بالنسبة للحريرة انا اعمل الحريرة الفاسية عالطريقة المغربية ومش لازم تكون حارة قرن فلفل في اخر الطياب يكفي للذوق و للبنة
جاري الفريك مانديروهش حار غير ماقتلك قرن فلفل ونعناع عالاخر للبنة
في رمضان عنابة هنا حكاية اخرى و طويلة
و تدخلي ليس بدافع الهجوم وانما بدافع الغيرة على مدينتي وحبي لها
تحياتيعلى بالك علاه وين تروحي تشوفي بلي ماكلة عنابة خير لانك مالفتها وتحبيها كل قط في عين امه غزال انا ثان كون واحد يهدر على بلادي راح نزعف وانا مانيش في بلادي راني برنية في الغرب واللي في الغرب يحس ببلادو اكثر نتمنى اني نلقى وحد منالشرق مشي اني ندافع على بلادي بركمانيش مغلطاتك انت هدرتي هكا بحكم انك طول متغربة ومتوحشة بلادك ماتحبي حتى واحد يمسها تحياتي الى كل ناس عنابة انا طول نجيها لسيدي عما روبرحال ونداوي ولدي في كلينيك الجزاير ونحب السنكلو و..................:34::mh31:

hasna19
2012-04-15, 22:48
:19:


شكون هذا اللي ما يعرفش طعمة فمو يحكي و يقول معجبتنيش ماكلة عنابة:mad:
يا اما اليدين ماتعرفش و الطياب مش في كارو يا اما الطياب العزيز الغالي تاع عنابة اللي استطعموعندك ماعندوش ذوق في الماكلة:1:
ماكانش واحد ذاق الماكلة العنابية الحرة البلدية و قال مش مليحة
وهو اللي يجي يسكن ولا يولد في عنابة يكون عنابي وعارف بعوايد طيابها لا يا اختي
جيبي ضيوفك هنا و شوفي بنات البلاد و حراير عنابة و ذوقي طعامة صويبعاتهم العزيزة
حبيبتي قداه من وحدة اتزوجت في الغرب و اهل راجلها حارو
في عوايدنا اللي ماكانش لا في الجزاير لا في العرب
طيابنا وحدو و اعراسنا وحدهم
ونزيد شئ طياب قسنطينة زادة ماعندنا مانقولو فيه طعم و ذوق عندهم حاجات كيما حنا
و ماعندناش غير المرق الابيض عندنا الاحمر و المرق الحمرا
مش الناس الكل تعرف تطيب الملوخية و القناوية و الخمورية و الشخشوخة عادة حمرا و البوراك العنابي و الرشتة بالدجاج
بالنسبة لللاخت اللي قالت الحار نعم نديرو الهريسة ونخدموها في الدار مفلفلة تقتل ههههههههههه و لكن مش كل حاجة نديروها حارة
شخصيا ماناكلش الحار ياسر انا
و الجاري بالقرصة و الجاري الابيض بالبنادق و الجاري بالفريك وهذا يطيب لازم في برمة فخار و طماطم كعب مش مصبرة
التليتلي و المحور بالزعفران و الكسكسي عندنا اشكال وانواع
بالخضر و الكسكسي بالحوت و الكسكسي العراسي و المسفوف و الكسرة الرخسيس و المطلوع و خبز الكوشة و المعدنوسية
و القريتلية بالبنادق و المقرطفة و النواصر و الفطير و الظولمة بانواعها تاع الزيتون و غيرها المحشي فلفل محشي و القرنون المحشي و البرانية باللحم والكتف المحشي و الحوت في الكوشة و الطواجن و شباح الصفرة و المرقة الحلوة و الدويدة المطبوخة بالدجاج و طاجين بونارين و البطاطا في الكوشة و البطاطا قرنون
وطاجين الرخام و عين السبنيولي و الحميص
و السلاطة المشوية و الجلبانة بالقرنون و الخ و الخ و اذا نسيت اكلة فكروني يا بنات عنابة:1:
نجيو للحلو عندنا المقروظ سلطان السينية و البقلاوة العنابية تكون بالجوز اكثر معروفين حنا بيها و تكون على زوج فراشات يعني طبقتين و الغريبة تذوب في الفم و قرن غزال باللوز و الكعب كبار يكون بالسكر الارطب و كاين اللي يديرو من غير سكر يزينو برك باللوز و طمينة اللوز و مقروظ اللوز و مقروظ المقله و المقرقشات و عمامة القاضي و الصامصة وخبز الباي و نعملو معجون السفرجل و العنب معروفة عنابة بيه و نقطرو الزهر و الورد ونخدمو بما الزهر اكثر خلافا على قسنطينة اللي يخدمو بماء الورد هاذو تاع زمان المعروفة بيهم عنابة اما الباقي حلويات جديدة
حكيت عن الحلويات اللي تاع بكري و اللي زمان تلقاوهم في كل دار و الطمينة بالغرس و الرفيس الزيراوي و المشلوش و المسمنات و التالاشت بالعسل و الغرايف و البراج في الربيع
واللي عنابية و بنت بلاد تعرف الطياب اللي قلت عليه
طياب عنابة المخير في الشرق و في الجزاير:19: بشهادة الطباخين اللي عملو هنا في عنابة و جابو اطباق من وهران و سعيدة و تلمسان اقصد الفنادق و المعارض
رحنا داخل الجزاير و خارجها الغرب عجبهم طيابنا و الوسط حبوه و الجنوب عجبهم و حتى في الخليج جاو لعراسنا و اتزوجو ببناتنا و هبلو على عاداتنا و لبستنا الاصيلة وذهبنا حتى الذهب ماشفتش في الجزاير كاملة عروسة او مراة تلبس الذهب كيما عنابة و طيابنا عزيز وغالي
المهم اللي تحب اي اكله عنابية تطلب وحنا في الخدمة
الشكر الجزيل لام ظافر صاحبة الموضوع
وليس قصدها او قصدنا ان الاكل تاع ناس الغرب موش مليح بالعكس احنا جزايريين ونفتخرو بالشرق والغرب و كل ربوع الوطن الحبيب
و مافيها باس لو نتعلمو من بعضانا
و في الاخير الطبخ ذوق و فن وكل واحد يضرب على اصله و بلاده:19:
عجبني رد الاخت رماضنة كفت و وفت على اكلات منطقتها و ياريت كل وحدة تحكي عن طبخاتهم و تفيدنا و يصير تبادل شرقي غربي وسطي جنوبي هههههههههههه



ياايمـــة عليك ياقيطة واحد مايقدرعليك هههههههه ربي يكون في عوون اخينا

المهم نقوولك هدرتك تهبل وعسل زي مولاتها ونبصم بصوابعي العشرة واحد ماداق ماكلتنا وقال مشي بنينة كي يجيونا من الوسط والا الغرب يحييرو يقولونا كيفاش طيبتووها حتى المقرونة تولي عسل ههههه

نسيتي حاجة وحدةالبرااج تع الربيع تجي تهبـــــل وبنتها وحدها

نيفرتيتي.
2012-04-16, 10:21
والله يا العنابية انت باين فيك شاطرة قد ذراعك قد لسانك بصح انا نقلك عندنا كنة عنابية والله ماتعرف طيب الماكلة تاعها تقول تاع سبيطار مرة كلبنا عندها شربة واش راح نقلك تاع الرلاستو تاع الجامعة خير والتليتلي كيفكيف ثان طاجين جبن خسارة اللحم اللي داراتو مايشبه لوالو طيبت الحم مرحي في الماء زبعد رمات الما تاعو كاش راح في الما مشي قلت الحم وفوحاتو يجي بنين اما عندنا عنابية اخرى ماكلتها هايلة بالخص البوزلوف كيفاه ديرو يعني كل بلاصة فيها وعليها

ام ظافر
2012-04-16, 10:50
اخواتي العزيزات اتمنى منكن ان لايحيد الموضوع عن هدفه
فكل منطقة في الجزائر ربي يحميها لكامل الجزائريين ما يعنيش انك عنابية تدافعي على عنابة امام واحدة جزايرية هذه جهوية وممكن جدا بكلامك تقيسي بزاف ناس
كل واحد يفوخ باصلو نعم ويضرب على عوايدو وتقاليد منطقتو صح ولكن بدون ما يقلل من عوايد المناطق الاخرى
مثلا قادرة في نفس البيت والمنطقة خواتات ما يطيبوش كيفكيف مثلا تلقاي واحدة تزيد الملح والاخرى تنقص وهذا يحدث فرق في الطعم
فمابالك من منطقة لاخرى والله ساعات نشوف طعام هنا في الغرب كل واحدة في الدار تطيبو زي على اختها وعلى امهم وهنا ما نقدرش نقول على اي واحدة فيهم انت الي طيابك اصيل واختك لا لانهم كامل من بيت واحد
والاكيد ان هذا الموضوع ليس من باب الافتخار بكل منطقة ولكن حتى نتعرفو على اكلات بعضانا وكذلك على التسمية المختلفة لنفس الطبق
اما انو واحد يعرف يطيب خير من الاخر هذه راجعة للذوق تاع كل واحد وفعلا مثل ما قالت الاخت ام دودة الشخشوخة العزيزة هنا في المنطقة الي انا فيها الان ما تعجبهمش ويقولونا تاكلو في العجين صحيح كاين الي هبلو عليها ولكن كاين ايضا الي ما تعجبوش خاصة الناس الكبار في السن وهذي ما عندهاش علاقة باليدين بل اذواااااااااق

zahra30
2012-04-16, 12:39
اواه اواه اختي ام ظافر راني نشوف باللي الموضوع انتاعك فيه استعراض العضلات انا احسبتو المهارات ههههههه
المهم يعطييك الصحة على الفكرة وان شاء الله البنات ايشاركو بالاكلات المعروفة عندهم
وتبقى مسالة الذوق هذا حسب راي تتحسب على مدى شطارة المراة يعني كاينين اكلات بسيطة وتجي الذ على يد وحدة تتقن فن الطبخ والعكس اكلات في القمة وكي تدريهم وحدة قليلة الخبرة ممكن تكون صامتة وكاينين بزاف اكلات انتاع الغرب ماشي معروفة
عند انتاع الشرق ( بصح زيدي الشمال والجنوب هكى تكتمل بلادنا ههه )
المهم تبادل المعرفة والثقافة المطبخية ان صح التعبير
بالتوفيق
http://vb.arabseyes.com/uploaded/24878_1189177374.gif

ahlem_22
2012-04-16, 13:52
يريت بدون مشاكل كل واحد و تقاليد ديالو

و بلادي من غرب لشرق و من شمال لجنوب شااااااااااااااابه

نيفرتيتي.
2012-04-16, 14:16
ياناس الشرق لازم نشرفو بعضانا بالكلام الزين

gatta.annabia
2012-04-16, 20:40
ياناس الشرق لازم نشرفو بعضانا بالكلام الزين



والله يا عزيزتي ناس الشرق يشرفو الشرق و يشرفوا الجزاير الكل على قد اللسان على قد الذراع:1::1:



و درك يا الفحلات كل وحدة فيكم من الشرق الجنوب الغرب الوسط توريلنا حنة يديها العزيزة و تقلنا
وش هي اطباق منطقتها التقليدية والجديدة:19:

نيفرتيتي.
2012-04-16, 21:18
والله يا عزيزتي ناس الشرق يشرفو الشرق و يشرفوا الجزاير الكل على قد اللسان على قد الذراع:1::1:



و درك يا الفحلات كل وحدة فيكم من الشرق الجنوب الغرب الوسط توريلنا حنة يديها العزيزة و تقلنا
وش هي اطباق منطقتها التقليدية والجديدة:19:
انعم احنا تاع الشرق نشرفو لكن كل واحد يحترم عادات وتقاليد الاخرين ومانتهجموش على الغير والمعذرة انا اللي عاودت حركت الموضوع لكن ليس هكذا

hasna19
2012-04-16, 21:50
والله يا عزيزتي ناس الشرق يشرفو الشرق و يشرفوا الجزاير الكل على قد اللسان على قد الذراع:1::1:



و درك يا الفحلات كل وحدة فيكم من الشرق الجنوب الغرب الوسط توريلنا حنة يديها العزيزة و تقلنا
وش هي اطباق منطقتها التقليدية والجديدة:19:


بنت بلادي وشرايك نفتحو ملف على اطباق عنابة وانتي تطيبي وماما تطيب ونحطو شطاارتنا(قصدي شطارة ماما ههه) ونورو لبنات بلي على قد اللسان كاين ذرااع:d

gatta.annabia
2012-04-16, 22:04
بنت بلادي وشرايك نفتحو ملف على اطباق عنابة وانتي تطيبي وماما تطيب ونحطو شطاارتنا(قصدي شطارة ماما ههه) ونورو لبنات بلي على قد اللسان كاين ذرااع:d

حسناء عنابة راكي هنا ديما في ذفاري هههههههههههههه
معليش يا لالة هيا بصح حبيت كل المناطق تعطينا اطباقها خلي نصنفو و ننوعو
ربي يعيش لك ماما :19:

gatta.annabia
2012-04-16, 22:18
والله يا العنابية انت باين فيك شاطرة قد ذراعك قد لسانك بصح انا نقلك عندنا كنة عنابية والله ماتعرف طيب الماكلة تاعها تقول تاع سبيطار مرة كلبنا عندها شربة واش راح نقلك تاع الرلاستو تاع الجامعة خير والتليتلي كيفكيف ثان طاجين جبن خسارة اللحم اللي داراتو مايشبه لوالو طيبت الحم مرحي في الماء زبعد رمات الما تاعو كاش راح في الما مشي قلت الحم وفوحاتو يجي بنين اما عندنا عنابية اخرى ماكلتها هايلة بالخص البوزلوف كيفاه ديرو يعني كل بلاصة فيها وعليها


والله يا عزيزتي واحد ما مبهدلنا غير الكناين هاذو هههههههههههههههههههههه
كيما كنة خالي زعما طبيبة نقولولها رانا كامل قاريين بصح في الدار هاذي لازمة
والمصيبة ماتحب تتعلم و ماتحب تخليك تعلميها تحس باللي راه نقص ربي يهديهم
شخصيا اللي تعرف تطيب مع اني شاطرة نلصق فيها ومانخليهاش حتى نتعلم ندير كيفها و احسن ههههههههههههههه يا لوكان تكون من السنغال تعجبني ماكلتها نروح ونتعلم مافيها والو بالعكس راهي ف الفايدة

واحترم كل العادات ولا اتهجم لاحظي انتي تحكي مع ماجستير في القانون يعني دكتورة بعد شهرين يعني مثقفة و واعيه
و لا اتجرا ابدا ابدا على التقليل من احترام بلادي شرق غرب جنوب وسط كلهم عسل على قلبي
لكن توصل لعنابة و نقطة اللي ماتعرفش عاداتنا ماتحطش حاجات و تلخبط فيهم تسقسي و بعد تحط و ماتقولش عنابة طيابها مش مليح
كيما هوما يعجبوهم حاجات وحاجات لا
حنا تاني كيف كيف
تحياتي لكي و اعلمي انه ردي عن محبة لكي ولكل اخواتي المحترمات هنا:19:

ام انس5
2012-04-17, 01:23
بنات الجزائر كامل الله يبارك عليهم كل اصبع بصنعة .

ghalia123
2012-04-17, 05:48
الاخت العنابية والله كلامك عسل عسل
و باين فيك شاطرة ربي يبارك
انا تاني والله تعلمت كلش من يمة والكلام اللي قلتيه الكل راني معاك فيه
وتحيا عنابة يا اختي العزيزة
و تحيا الجزاير والله قلبي شايق لعنابة و عراس عنابة و ريحة عنابة
ربي يجزيك خير قدمتي باختصار الاصالة العنابية
وكلنا خاوة في الجزاير

om nour
2012-04-17, 09:23
شوفى اختى كااااااانت بكرى تقولى هكدا و لكن دوركاااااااا رانا فى عصر النت الى حب حاجا و حب يتعلمها يلقاها وتانى انا من الغرب و نعرف كامل المعجنات الشخشوخة انتاع قسنطينة و تليتلى والرقاق يديروه فى الغرب والرشتة و مشكووورة اختى على مجهوداتك

gatta.annabia
2012-04-17, 13:54
الاخت العنابية والله كلامك عسل عسل
و باين فيك شاطرة ربي يبارك
انا تاني والله تعلمت كلش من يمة والكلام اللي قلتيه الكل راني معاك فيه
وتحيا عنابة يا اختي العزيزة
و تحيا الجزاير والله قلبي شايق لعنابة و عراس عنابة و ريحة عنابة
ربي يجزيك خير قدمتي باختصار الاصالة العنابية
وكلنا خاوة في الجزاير


ربي يعيشك يا عزيزتي:mh31:كللهم شاطرات ربي يبارك
وانشالله تجي عنابة و تشبعي منها
و رانا الكل خواتات نتعلمو من بعضانا
الطبخ موسوعة و ذوق وفن و اصالة و تجديد
:19: