طريقتي في اعداد العدس واللوبيا

[سارة البوسعادية]

صباح الخير اليوم حبيت نعتلكم طريقتي في اعداد العدس واللوبيا
الكل يعرف انو العدس واللوبيا ماعادوش بنان كيما بكري نشفا يما كانت كي تنصب لاكوكوت نشمو وانا نقرا
وزيد مع تشمخيه وتبدلي الما نتاعو بعد ما يطيب وش نحكيلك كون ديريهم بلحم يقعدو مش بنان
المهم طريقتي بلا تشماخ وبلا تبدال ما
نحط العدس ولا اللوبيا نضيف الطماطم والتوابل البصل الحار الزيت والجزر والما واهم حاجة نضيف نصف ملعقة صغيرة خمارة فورية
ونخليهم حتان يغليو ونسكر عليهم لاكوكوت نخليهم تقريبا ربع ساعه ونفتح عليهم ونحرك وادا صبتهم مزال شوي نزيت نسكر عليهم وبلاكم تنساوهم راكم تصيبوهم بيري
ملاحظة نصف ملعقة صغيرة تضاف في الكيلو من العدس او اللوبيا


وشكون جربها او يعرفها؟؟:mh92:

[wala]

السلام عليكم يعطيك الصحة على الفكرة انا العدس مانشمخوش باش يجى بنين حمصيه اى نشفيه من الماء فى مقلة ثم ضيفى قطرات من الزيت وحمصيه ثم اضعه فى القدرة فيها البصل الجزر حبة بطاطا حبة لفت فلفل اسود قرفة فقط الكمون والطماطم فى اخر مرحلة كى يلبى لان الطماطم تمنع طياب الحبوب والكمون يمرار كى يطيب بزاف ونشمخ اللوبيا بماء به قليل من السكر كدلك الماء يلعب دور كبير فى حلاوة الاكل حسب كل منطقة وهدا عن تجربة

[الجزائرية المحبوبة]

اختى عدس نشمخوه فقط بلا خميرة ونطيبوه

ولوبياء نرنخها في خميرة ومن غد نطيبها وحدها

ومن بعد نطيب جزر مع مرق ولما طيب نضيف لها لوبيا

واما دامك من بوسعادة طيبى بماء قادة ولا ماء فاطم الزهراء
وكاين البعض قالوا لما نشروا العدس ولوبي نشمخهم في ماء ومن بعد يخبوه في كونجلتور راه يطيب لكن مجربتوش

[الجزائرية المحبوبة]

اختى عدس نشمخوه فقط بلا خميرة ونطيبوه

ولوبياء نرنخها في خميرة ومن غد نطيبها وحدها

ومن بعد نطيب جزر مع مرق ولما طيب نضيف لها لوبيا

واما دامك من بوسعادة طيبى بماء قادة ولا ماء فاطم الزهراء
وكاين البعض قالوا لما نشروا العدس ولوبي نشمخهم في ماء ومن بعد يخبوه في كونجلتور راه يطيب لكن مجربتوش

[wissem173]

شكرا على الفكرة...نفهم بلي اللوبيا طيبيها بلا ما تشمخيها ليلة من قبل؟و طيب عادي؟

[ذكرى أبي]

شكرا لكن على الطرق ، لكن قولولي برك واش مالخميرة تاع الحلويات ولا الخبز

[بيلسان11]

انا نخدم بخميرة الحلويات.

[wala]

السلام عليكم الخميرة لى يستعملوها لنضج الحبوب هى خمارة الحلوى او استعمال اقل من نصف ملعة بكاربونات وفعلا مثل ماقالت الاخت على الكونجيلاتور يحلل المواد القاسية فى اى شيى تخبيه اللحم الحبوب _____

[ام الورود]

اختي مشكوره لكن عندي تعليق حول الحبوب وعلى حد علمي توضع لها مواد حافضه لذلك يفضل ترنخي اللوبيا يوم من قبل للتخلص من المواد الحافظة اما العدس فغليه 5 دقايق وسيحي الما وديريلو ماء جديد قبل ما تضيفي البصل والتوابل

[yara djoumana]

يعطيك الصحة

[wala]

السلام عليكم شكرا لك على معلومة المادة الحافضة ام ورود

[خربشة ناعمة]

يعطيك الصحة على الموضوع
عموما راه كاين العدس واللوبيا اللي يطيبوا بلا ما خميرة الحلوى

اما طريقتنا تختلف
في العدس مانشمخهوهش ليلة من قبل كيما الحمص واللوبيا

نغسلوه مليح مليح
و امبعد نحطوه يغلي في الماء
مع سنينات ثوم مع وريقة رند
امبعد كي يغلي مليح ويدخلوا شوية طياب نصفيوه وما نرميوش الماء
نرابيو حبة طماطم و نرابيو الثوم اللي طابت معاه و مانديروش البصل
على خاطر العدس الاصل انتاعوا في الطياب الثوم ماشي البصل كيما اللوبيا
ونديروهم يتقلاو مع الزيت الملح فلفل اسود كمون فلفل احمر عكري الحرور
وشوية معدنوس واذا حبيتي الكرافس ارميلوا
وريقة واللي حبت تحط الزرودية او البطاطا كيف كيف
وبعدها نديروا معاها العدس يتقلى مليح ونزيدلوا مغرف طماطم مصبرة ونمرق بالماء اللي غلى فيه و نخليه يطيب
و راهي تجي المرقة انتاعوا عاقدة
والذوق رائع

اما اللوبيا نديروها تتشمخ ليلة من قبل
ومبعد نديرولها ماء جديد ونحطوها تغلي مع الثوم والكرافس والمعدنوس
كي يدخلها الطياب نصفيوها ونرابيو البصل والثوم والطماطم
ونديروهم يتقلاو مع الزيت الملح فلفل لكحل كمون فلفل عكري حرور
ملعقة طماطم مصبرة وريقة رند معدنوس كرافس ونضيفوا اللوبيا تتقلى ونمرق بهاداك الماء الللي غلات فيه
و نغلق الكوكوت 20 د او 30 د و الريحة راكي تشميها من بعيد

[nadia63]

c'est bien tout ce que vous dites ,est merveilleux,seulement faites attention,la fermeture de la cocotte,pour les légumes secs,peut causer,une explosion ,donc eviter,car la soupape risque de se boucher,woujouhakoum ghaliine alina

[ملاك1988]

:mh31:اختى عدس نشمخوه فقط بلا خميرة ونطيبوه

ولوبياء نرنخها في خميرة ومن غد نطيبها وحدها

ومن بعد نطيب جزر مع مرق ولما طيب نضيف لها لوبيا

واما دامك من بوسعادة طيبى بماء قادة ولا ماء فاطم الزهراء
وكاين البعض قالوا لما نشروا العدس ولوبي نشمخهم في ماء ومن بعد يخبوه في كونجلتور راه يطيب لكن مجربتوش
وينك ياليلى راني نجوس عليك

[ملاك1988]

فكرة جيدة............

[الجزائرية المحبوبة]

:mh31:
وينك ياليلى راني نجوس عليك

مافهمت قصدك اختى

[سلاف26]

العدس و لوبيا طيبيهم بالماء تع الشتاء "المطر" حنا دايما كي طيح المطر نديرو بسينة و نحجروه و نطيبوا بيه الحبوب يطيبو زبدة روعة و في وقت قصير جدا جربيه اختي

[سوفية فحلة]

اتوقع رح يكون احلى مشكورة

[الوردة الحمرية]

صحيح اختي البقوليات نتاع هذا الوقت ما راهومش بنان لاكن هذا الموجود والحمد لله انا تاني ما تشمخهمش العدس نحط الزيت في الكوكوط ونحط البصل والالفلفل احمر والكمون ونضيف مباشرة العدس المنقي والمغسول جيدا ونقلي ونضيف الطماطم المرحية والمعلبة ونقلي جيدا ثم نمرق بماء ساخن ملاحظة مانمرقش كثير لكي لاسمحا الله تتبوشة مكان الصفارة ونغفلش عليها ولما نفتح نلقى كلش طاب اما اللوبياء نحطها في الكوكوط ونغلق ثم لما تطيب نضيف البصل المرحي والثوم والكمون وراس الحانوت والزيت والطماطم ونعاود نغلق قليلا حتى تخثار انا نحب نحط ورقة رند والدبشة صدقوني تجيء هايلة

[R I A D]

يعطيك الصحة يا سارة
انا العدس ما نشمخوش و كي نطيبو ما نبدلوش الماء
نغسلو و نحطلو الزيت و نحطو يطيب نص طياب
من بعد نحطلو الدواوات و نرجعو يكمل طيابو نوغمال

و اللوبيا نشمخها ليلة كاملة و نبدللها الماء مرة
و الغد نحطها في الكوكوط و شوية زيت و تغلق
نحلها في نص الطياب و نحك الدواوات و نعاود تغلق حتى تطيب

[أم إناس]

بارك الله فيك

[تغرينية]

يعطيك الصحة

[طهراوي ياسين]

يعطيك الصحة

[MinaNina ADEL]

شكرا على المعلومة

[oum malek]

بارك الله فيك ان شاء الله مأجورة

[raoufnina]

--------------------------------------------------------------------------------
مشكوووووور والله يعطيك الف عافيه
موفق ان شااء الله

[oumeima m]

فكرة جيدة.

[أم ابتيهال]

العدس ما نشمخوش بصح اللوبي لازم تشمخ

[ام فيفي]

تسلم الايادي:19:

[*أم ثازيري*]

شكرًا سااااااااره
بصح حاذري من الخميره مع تسكار لاكوكوت قادره تتفلق بعيد الشر
عن تجربه هادي خطره كنا نقراو طبخ و رايحين نديرو المثوم درنا الحمص و معاه شويه خميره تفلقت لا كوكوت

[idron0]

يعطيك الصحة اختي

[denise]

merci pour ta recette

[ام براء عبيدة]

مليييح انا نعرفهاش

[كوثرنيل]

القيتكم تهدرو على العدس قلت حتى انا نشارك بطريقتي بلاك تعجبكوم انا نغسلو مليح بالماء ونحطو في الكوكوط ومن جهة نرحي حبة طماطم وثوم وقليل بصل وربطة دبشة في الميكسور ونظيفهوم للعدس زائد الملح والزيت وفلفل اكحل وطماطم مصبرة وماء ونمرق هوبلا ما تزيد اللحم اكون لديد ولوكان تزيدلو قطعة دجاج اوعظم رايح تكون البنة لاتقاوم مع ملاحظة العدس احب الدبشة والثوم عن تجربة

[daloula_s]

merci 3ela fekra nechallah nejrbha

[mosta*limoges]

شكرا على الفكرة
أنا العدس ما نشمخوش نديرو عادي و يطيب مليح
سأجرب الفكرة مع اللوبيا

[chahrazed g]

يعطيك الصحة

[عبير الوررد]

حتى انا العدس منشمخوش اما لوبيا نشمخها ليلة قبل