شكون تعرف عفسة تاع زيتون تاع طبابخة

[samsouma samah]

حابة يجيني زيتون كيما تاع لعراس خاثر ولا كيما هذاك لي يتباع في ليرستورو شكون تعرف الوصفة تفيدني بيه واجرها على الله نعرف بزااااف طبابخة يقولو السر في تكسير البيض فوق مرق الزيتون مي مافهمتش كيفاه عاونوني باه يجيني زيتون كيما نتاوعهم

[وردة21]

اختي انا الزيتون يجيني هايل والمرقة نتاعو خاثرة نضيفلو ملعقة كبيرة نتاع فرينة نحلها في فنجان نتاع ماء بارد باش ماتتكورش جربيها وادعيلي بالذرية الصالحة

[أم ياسين الزهراء]

انا ندير صفار بيضة مع شوي قارص ونرميها على المرقة ونحرك مليح ونطفي

[*نآدرة~]

شفت واحدة واحد المرة تبشر حبة بطاطا فيه،كي سألتها وعلاه قالتلي باش يخثارلي المرق،أنا ما جربتهاش بالصح فعلا تاعها يجي خاثر وان شاء الله يفيدونا الاخوات

[ميرة31]

يعطيك الصحة

[زهراء48]

يااختي الكريمة عندما ديري طاجين الزيتون ما فيها حتا عفسا لازم طيبيه في مرقا قليلا ومني فيها فلفل اسود وعود قرفة ووريقة رند ومين تخبي تطفي عليه زيديلو شويا نشا اوفرينة وباه ما تتكورلكش نحي شويا مرقا وخليها تبرد وزيديلها نشا او فرينة احسن ما ديري هذا الشي في الماء البارد وضيفيه

[amiramirna]

السر فملعقة الفرينة

[katrine]

انا نحط مغرف تاع روز مرحي كي نكون نقلي فالبصلة واللحم وتخرج المرقة روعة

[ام ملاك.]

انا كي نمرق مانديرش بزاف الماء اذا فيها لحم ندير للنص الماء ونخليها تطيب ونسيت البصل ثاني يتقل ويخثر المرقة
السر قع في الما

[نعيمة29]

يعطيك الصحة

[ميادة شارف]

انا ندير مغرف فرينة في قليل من صوص ونفرغها فرقه

[ام ضياءالدين]

نحي شوية مرقة وخليها تبرد ودير فيها الفرينة وخلطي وضفيها للمرق انتاعك وحركي وخليها تغلي شوية وطفي النار تجيك خاثرة وبنينة

[samsouma samah]

شكرا للجميع على المرور الطيب نشااالله نجرب ونعطيكم ب الخبر صاحيتو بزاف ونامل مزيد من الافكار

[إلهام07]

شكرا للجميع على المرور الطيب نشااالله نجرب ونعطيكم ب الخبر صاحيتو بزاف ونامل مزيد من الافكار

راني كتبتلك موضوع على جالك و هذا الرابط :
http://www.djelfa.info/vb/showthread.php?p=12717407#post12717407
أرجو أن تدخلي الموضوع و تقرايه و تستفادي راني كتبتو خصيصا لك:dj_17:

[zhor1970]

البصلة تكون مرحية مليح وتكون كمية كبيرة ايجي الزيتون خاثر روعة وخليه ايطيب فيغرضو


وماتمرقيش بكمية كبيرة تاع الماء وكل ما حبيتي اتجيك الكمية بزاف كثريالبصلة

[*أم كوثر*]

انا نعطيك سر معتمداتو تجيك بنييييييينة وخاترة ولونها يشهي
كي تكملي وقريب تطفي رابي شوية فرماج روج ولوحيه في المرق وحركي بسرعة وطفي وتفكريني
واكيد من الاول تنقصي كمية الملح

[mirafou]

ki ytib zitoun ta3a madame wthebi tnahih men fo9 nar diri moghorfa ncha fi fenjane ma halih mlih wkobih 3la zitoun khalih 2mnt yaghli w tafi 3lih dok tchoufi lmarga ta3o khatra .

[aminaskikda]

اختى ديرى بيضة و ملعقة كبيرة ليمون خلطيهم مليح و كى تطفى على الكفتة او طاجيجين الزيتون هزى شويا تاعلصوص خلطيها مع البيض وبعد حطيها فا البرمة .............والله الدوق يجى هايل و تختار شويا و لاكان حبيتيها تختار بزاف زيدى مع البيض النشاء حولى ملعقة اكل

[اية الرحمن1988]

السلام عليكم
انا خويا عندو مطعم هوما على حساب ما يطبخوه يغليوه في الماء مليح
ومباعد يديرلو مرقة وكي تكمل المرقة طيب يا يحطو فيه صفار البيض مع شوي قارص
ولا حبة بطاطا ترحيها مليح كي purée في صحن وتضيفي عليها شوي مرقة وتخلطيها مليح وحدها مباعد تضيفيها للمرقة كامل
لأنو إذا رحيتي البطاطا وحطيتيها طول في المرقة كامل ممكن ديرلك كريات صغيرة يقلقو

[simou19]

حابة يجيني زيتون كيما تاع لعراس خاثر ولا كيما هذاك لي يتباع في ليرستورو شكون تعرف الوصفة تفيدني بيه واجرها على الله نعرف بزااااف طبابخة يقولو السر في تكسير البيض فوق مرق الزيتون مي مافهمتش كيفاه عاونوني باه يجيني زيتون كيما نتاوعهم

اهليييييييييييييييييييييييييين حبوبتي انا ندير شويا فرينة نخلطها في الماء ونضيفها للمرقة باه تخثار

[كوثرنيل]

انا شفت بعض طباخات قسنطينة يظيفو قليل من الفريك مرحي غبرة يحللوة في الماءويضفوه قبل مايطفيو النار بقليل وانا جربتها وكانت نتيجة مليحة

[كوثرنيل]

ضفي ملعقة فريك مرحي غبرة بعد ماتحلليةفي الماءاو اكثر حسب كمية الزيتون نتاعك انا في الاول لما قالولي عليها ما تقبلتش فكرة نظيف الفريك رطب للزيتون لكن لما جربتها عجبتني ورجعت نعتمد هدة الطريق وهده الطريقةتعتمد عليها طباخات الاعراس واخيرا ارجو الاستفادة منةا

[oumraouf]

صباح الخير أختي ، أقولك السر هنا يعملوه طبابخة الجزائر , وهذا الوصفة أخذتها على جارتي لما كنت أسكن في وسط العاصمة ، ابنها طباخ ، يستعمل السميد الأحرض مع اللحم ، وهذا حتى يزكى وكذلك هو اللي يخثر المرق .

[oumraouf]

تابع للرد السابق، كما قتلك يستعمل السميد الأحرش مع اللحم المفروم وهذا حتى يزكى اللحم - لأنه مطعم - وكذلك حتى تخثار المرقة . اما أنا في الأوانة الأخيرة أصبحت استعمل قليل من سميد الفريك - نعم سميد الفريك وهذا نستخلصه لما نرحي الفريك المخصص لشربة رمضان ونغربلها أستفيد من ذلك الذي ينزل من الغربال على شكل سميد وأستعمل به الكفتة . اتمنى أنني افدتك ..

[aissa amina]

اما انا نرابي البصل و الجزر في المرق الي لازم يكون قليل و لما يطيب ندير العقدة هي شوية مرق بارد شوية فرينة سكنجبير والخل و خليه يزيد يعقد يجيك روعة